2022-жылдын 28-мартында manas-discovery.kg сайтын ачып, элибизге кубанычтуу жаңылыгыбыз менен бөлүштүк эле. Мына ушул сайтыбыздын ачылганына туура бир жыл болду. Бул сайттын ачылышы Манас таануучулар, жалпы окурмандар үчүн кубанычтуу жаңылык болгон. «Манас» эпосунун бирдиктүү маалыматтарын камтыган атайын сайттын ачылыш тарыхына кайрыла турган болсок, бул сайтты  Борбор Азиядагы Америка университети менен Кыргыз улуттук илимдер академиясынын Ч.Айтматов атындагы Тил жана адабият институту менен биргелешкен долбоорунун негизинде ишке ашырылган. Сайттын ачылышында Ч.Айтматов атындагы Тил жана адабият институнунун директору, академик А.Акматалиев жана “Эркин өнөр жана илимдер” факультетинин деканы, БААУ Данияр Карабаев сөз сүйлөшүп, сайттын ачылыш максаты жана келечекте аткара турган иштери тууралуу маалымат беришип, сайттын мындан аркы ишине ийгиликтерди каалашты. 

Андан соң  келген конокторго сөз берилип Кыргыз улуттук илимдер академиясынын Ч.Айтматов атындагы Тил жана адабият институтунун “Азыркы кыргыз тили” бөлүмүнүн башкы илимий кызматкери Мусаев Сыртбай Жолдошевич жана
Кыргыз Республикасынын Президентинин Администрациясынын саясий жана экономикалык изилдөөлөр башкармалыгынын изилдөөлөр, саясатты иштеп чыгуу жана реформаларды ишке ашыруу бөлүмүнүн эксперти Капалбаев Октябрь Эркиновичдер сайттын ачылышы менен кызуу куттуктап, бул сайт кыргыз эли үчүн, жалпы манас таануучулар үчүн эң сонун жаңылык экендигин баса белгилеп өтүштү.

«Манас» эпосуна байланышкан документтер менен маалыматтарды санариптештирүү алкагында «manas-discovery.kg» сайты ишке кирген тартып бир топ алгылыктуу иштер жүргүзүлүп келе жатат. 

Бул сайтта «Манас» эпосунун варианттарынан тарта манасчылардын өмүр баяндарына чейин, дегеле «Манас» дүйнөсүнө таандык бардык маалыматтарды табууга болот. Эми окурмандар чөнтөк телефондон эпостун мазмуну, каармандарынан баштап, китептердин, илимий изилдөөлөрдүн, макала, маектердин электрондук версияларын, манасчылардын өмүр баянын окуй алат. Ошондой эле, сайтта эпоско байланыштуу бардык медиа материалдар жеткиликтүү көрсөтүлгөн. Сайттагы маалыматтар улам жаңыланып, кызыктуу жаңылыктар менен толукталып келе жатат.

Бул сайттын максаты  — «Манас» эпосун жөн гана оозеки элдик чыгарма катары баалабай, аны терең изилдөө, эпосто камтылган ар бир идеяны талдап чыгуу жана заман талабына ылайык, баалуулуктарды жайылтуу болуп саналгандыктан, бир жыл аралыгында бул максаттарыбыздын баардыгын кыргыз эли үчүн, жалпы манастаануучулар үчүн деп колдон келген аракетибизди жасап келе жатабыз жана келечекте дагы көптөгөн иштер аткарылат деген ишеничтебиз.

«Манас» эпосун 124 саат бою тынбай айтканы үчүн Гиннесстин сертификатын алган манасчы Рысбай Исаков 1-декабрда президент Садыр Жапаровдун кабыл алуусунда болуп, чыгармачылыгы жана пландары тууралуу сүйлөшкөнүн мамлекет басма сөз кызматы билдирди.

Жолугушууга маданият, маалымат, башчынын  спорт жана жаштар саясаты министри Алтынбек Максутов менен «Манас» театрынын директору Азиз Биймырза уулу да катышты.

Маалыматта айтылгандай, президент манасчыны Гиннесстин дүйнөлүк рекорддор китебине кириши менен куттуктап, анын өнөрү кыргыз элинин руханий турмушуна, элдик каада-салттарга жана Кыргызстандын жаратман өнүгүшүнө кошкон баа жеткис салымы экенин белгиледи. Ал келээрки жылы жаңыланган «Манас айылы» этнографиялык комплексинде миң орундуу «Манас» театры ачыларын, комплекс элдин этносунун, анын көп кылымдык тарыхынын, маданиятынын жана каада-салтынын, келечек муундарга тарыхты сактоонун символу болорун айтты.

Рысбай Исаков мамлекет башчыга чыгармачылыктын бул түрүн колдоп жатканы үчүн ыраазычылык билдирип, жакынкы келечектеги пландары, тактап айтканда, “Манас” театрынын алдында манасчылар мектебин ачуу ниети менен бөлүштү, ал жерден эл ичинен белгилүү манасчылар чыгарын билдирди.

Жолугушуунун соңунда президент манасчы Исаковго «Манас», «Семетей», «Сейтек» үч томдугун тапшырып, чыгармачылык ийгиликтерди каалаган.

Манасчы Исаковдун Гиннесс сертификаты Улуттук тарых музейине тапшырылды

Кыргыз Республикасынын эмгек сиңирген артисти, манасчы Рысбай Исаковдун Гиннесстин рекорддор китебине катталгандыгын тастыктаган сертификат 2-декабрда Улуттук тарых музейине тапшырылды.

Талас шаарында Манас атабыздын эстелиги областтык администрациянын имаратынын алдына орнотулду. 21-марттагы ачылыш аземге Кыргыз Улуттук «Манас» театрынын эмгек жамааты, министрлер кабинетинин төрагасынын орун басары Эдил Байсалов катышты.

Эстеликтин ачылышын утурлай 13-марттан 21-мартка чейин театрыбыздын манасчылары Талас облусунда күнү-түнү “Манас” айтты.

КРУИАнын Ч.Айтматов атындагы Тил жана адабият институтунун кызматкерлери Улуттук «Манас» театры тарабынан уюштурулган  Талас шаарында Нооруз майрамына карата 9 күндүк «Манас» айтуу иш чарасына  жана «Манас» атанын эстелигин ачуу салтанатына катышып кайтты.   Салтанаттын жүрүшүндө Талас элине театрдын жамааты тарабынан коюлган «Айкөлдүн аманаты» коюлуму көрсөтүлдү.

Маалым болгондой, эстелик скульпторлор Садабек Ажиев менен Токталы Мурзакаримов тарабынан иштелип чыккан, анын бийиктиги 12 метр, баасы 8,7 миллион сомго бааланган Айкөл Манас атабыздын эстелигин жеке ишкер Темирлан Сарлыкбек уулу белек кылды. Скульптураны курууга жана ташууга 1 миллион 100 миң сом каражатты “Альянс Алтын” ишканасы бөлүп берген.

         Нооруз эли-жерибизге эсендик, барчылык, молчулук алып келсин!

КР Улуттук илимдер академиясынын  академиги Абдылдажан Акматалиевдин илимий эмгек жолун, өмүр таржымалын чагылдырган “Өмүр тилеп, эртеңкиге жетели” аталышындагы «Академик Абдылдажан Акматалиев» даректүү тасмасы жарык көрдү. 

Анын бет ачары УТРКнын концерттик залында болуп, ага КР Мамлекеттик катчысы Сүйүнбек Касмамбетов, КР Министрлер Кабинетинин Төрагасынын орун басары Эдиль Байсалов, КР Жогорку Кеңешинин депутаты Камила Талиева, КР Баатыры Миталип Мамытов, Кыргыз ССРинин Эл артисти Дарика Жалгасынова, Физика-математика илимдеринин кандидаты, КР билим берүүсүнүн отличниги Роза Айтматова, КР маданиятына эмгек сиңирген ишмер, УТРКнын Башкы директору Кайрат Иманалиев жана башка бир топ илимий, маданий интеллигенция өкүлдөрү катышты. 

Тасманы тарткан режиссер КР эл артисти Молдосейит Мамбетакунов. 

Даректүү тасма менен катар А. Акматалиевдин “МАНАС: ТАЛАШ. ТАЙМАШ. БААЛАШ», “ЖАШАГЫМ КЕЛЕТ” аталышындагы эки китеби жана Сапалкан Ариповдун Абдылдажан Акматалиевге арнап жазган «КУМУРСКА» китептеринин таанытымы да болду. 

Өмүрүн илимге арнаган академиктин өрнөктүү баскан жолу тууралуу жасалган эмгектердин таанытымын жакында Улуттук биринчи каналдан көрө аласыздар.

Сиздерди профессор Пламтри Жеймстин “МАНАС” ЭПОСУНА ТИШЕЛҮҮ ИЗИЛДӨӨЛӨРГӨ ЖАҢЫЧА ИЛИМИЙ СЕРЕП (1856-2018)” китебинин бет ачар аземине чакырабыз.

Китепте мурда англис тилинде жарык көргөн «Манас» эпосунун түрдүү аспектилери боюнча изилдөөлөргө тиешелүү маалыматтар кыргыз тилине которулуп, санариптик доорго ылайык жаңы өңүттөгү илимий көз караштар менен толукталып берилген. Бул китепте «Манас» эпосуна тиешелүү кол жазмалар, оозеки жана жазма түрдөгү варианттардын ортосундагы байланыштар, ар бир доордун эпоско тийгизген таасирлери менен катар башка олуттуу тарыхый маселерге тиешелүү талдоолор камтылган. Ошондой эле аталган эпостун азыркы варианттары заманбап технологиялардын жардамы менен талданып, кызыктуу фактылар аныкталган.

Чын куран айынын он экиси (12.04.2024)

10:30-12:00

410- аудитория, БААУ, Аалы Токомбаев 7/6

Чакан даам татып кетүү мүмкүнчүлүгү тартууланат

МААНИЛҮҮ: Иш-чара ошондой эле гуманитардык илимдерде колдонуучу текcтти анализдөө багытындагы санариптик куралдарын тартуулайт.

Иш-чарага катталуу үчүн шилтемени басуу шарт https://docs.google.com/forms/d/e/1FAIpQLSdyiUPPQvsE0GITKTBlqWSmi1OmsEZZcSI8I-IBdDjJLcE3MQ/viewform